(Inspired by Psalm 84, v. 3 and 4**)


Gin God, oor LORD, take note o’t fan

A spurdie faas ti airth,

He shairly saw, an witness’t weel,

Yer ain, dear Hivven-birth.


For, Mither, in yer quate wey,

Ye aye kint far ti rest,

An, huddin bairnies up in pray’r,

In God’s Hoose, fand a nest.


Near-hand God’s altar, far the debt

O aa oor sins wis peyed,

Ye trauchl’t onward, blest in Luiv

Flowed fae Yer Saviour’s side.


An jist like fit the Psalmist said,

Ye fand peace ‘midst aa strife

Tho’ daiths and troubles cam, ye bade,

A brave, strang Ma, for life.


An here’s the thing I muse upon,

Dear Ma, ti us God-given:

The spurdie fell, but rose again

An tuik ‘er flicht ti Hivven.


An there ye bide, by Christ’s dear side,

Aa pain an trauchle free,

An ilky ene ye’ve left ahin

Breathes, “Mither, pray for me.”


(c) Bruce Gardner, 2019.


*] Spurdie = Sparrow in Doric.

**] “Even the sparrow has found a home, and the swallow a nest for herself, where she may have her young, a place near your altar, LORD Almighty, my King and my God. Blessed are those who dwell in your house; they are ever praising you.” (Ps. 84, v. 3-4)